Operation Overlord

D Operazioon Overlord isch e grossi militärischi Akzioon ane 1944 gsi, wo dr wyter Verlouf vom Zwäite Wältchrieg entscheidend prägt het. Me seit ere mängmol eifach au d Invasioon. Derby sind uf dr Syte vo den Agryyffer zmeischt Einheite vo den USA, vo Grossbritannie, Kanada, Poole, Frankrych und Neuseeland bedeiliget gsi.

S Wort «Overlord» bedüütet uf Änglisch sövel wie “Oberherr”. Im Zwäite Wältchrieg isch es als Deckname für d Landig vo de alliierte Druppe i dr Normandy, wo am 6. Juni 1944 agfange het, und füre ganz Agryff uf Frankrych ine bis uf Paris bruucht worde.